- نیویارک (اے ایف بی) اقوام متحدہ کے ہیڈ کوارٹرز کے باہر ورلڈ کشمیر اویئرنس فورم اور نیویارک و واشنگٹن میٹروپولیٹن علاقوں کی کشمیری امریکی کمیونٹیز کے زیر اہتمام احتجاجی مظاہرہ کیا گیا، جس میں کشمیری، پاکستانی اور دیگر کمیونٹی نمائندوں سمیت خواتین، بچوں اور بزرگوں نے شرکت کی۔مظاہرین نے اقوام متحدہ سے کشمیر سے متعلق اپنی قراردادوں پر عملدرآمد اور کشمیریوں کے حقِ خودارادیت کی حمایت کا مطالبہ کیا۔
مشترکہ بیان میں بھارتی وزیر خارجہ کو اقوام متحدہ کے پلیٹ فارم سے خطاب کا موقع دیے جانے پر بھی احتجاج ریکارڈ کروایا گیا اور بھارت پر کشمیر میں انسانی حقوق کی مبینہ خلاف ورزیوں کے الزامات کی عالمی سطح پر تحقیقات کا مطالبہ کیا گیا۔مظاہرے کے اختتام پر اقوام متحدہ کے حکام کو ایک یادداشت پیش کی گئی، جس میں مسئلہ کشمیر کے پرامن اور منصفانہ حل کے لیے سفارتی اقدامات پر زور دیا گیا۔